އިބްރާހީމް ޙަސަން
މިއަދު ދިވެހި ރާއްޖެއަކީ މިނިވަން ޤައުމެކެވެ. ދިވެހި ރާއްޖޭ މިނިވަން އަމިއްލަ ވެރިކަމެއް ކުރާ ޤައުމެއްގެ ގޮތުގައި އޮންނަތާ އެތަކެއް އަހަރު ތަކެއް ވެއްޖެއެވެ. މިނިވަން ކަމާއި ހައްޤުތައް ލިބި ރައްކާތެރިކަން ދީފައިވާ ޤާނޫނު އަސަސީއެއް ލިޔެ އެކަށައެޅިފައި ވާ މިނިވަން ދައުލަތެއްގެ ހިޔަލުގައި ދިވެހިން ދިރިއުޅޭ ހާލާ މެދު މިއަދު ވިސްނާލުމުން ދިވެހިންނަށް ލިބިފައިވާ މިނިވަންކަން އިޙްސާސް ވޭތޯއެވެ.
ބުރަ މަސައްކަތުން ހޯދާ ލާރިކޮޅު ގޭގައި ހުއްޓާ ގެއްލި ދާނެތީ، ފައިސާ ރައްކާ ކޮށްފައި ބަހައްޓަނީ، ފައިސާ ރައްކާ ކޮށް ބަލަހައްޓައި ދެމޭ ބުނެ އިސްތިހާރު ކުރާ ބޭންކްތަކު ގައެވެ. އެކަމަކު ބޭންކުގައި ރައްކާ ކުރާ ފައިސާކޮޅު ފެން ފޮދެއް ބޯލާހެން އެކައުންޓުން ވަގަށް ލޫޓު ވާލާއިރު ބޭންކަށް ކަހާތަން ހިރުވާ ވެސް ނުލައެވެ. ދިވެހިންގެ ބޭންކޭ ކިޔާ ބޭންކު އޮފް މޯލްޑިވްސް އެކައުންޓުގައި ހުންނަ ފައިސާ ކޮޅު ދިވެހިން ވަގަށް އެއް އެކައުންޓުން އަނެއް އެކައުންޓަށް ކަހާލާ އިރު ބޭންކަށް ނޭގޭ ބުނުމަކީ މިއަދު ލިބިފައިވާ ޓެކްނޮލޮޖީއަށް ވެސް ޖެހޭ ޖޯކެކެވެ. މިލިޔަނެއް ހާ ރުފިޔާ އެއް އަކައުންޓުން އަނެއް އެކައުންޓަށް ދޮވެލުމަށް މިނިޓެއް ވެސް ނުނަގައެވެ. ކަސްޓަމަރުންގެ ފައިސާ ރައްކާތެރިކޮށް ނުބެލެހެއްޓޭ ނަމަ ބޭންކުގެ ބޭނުމެއް އެބައޮތް ތޯއެވެ. ދިވެހިންގެ ބޭންކޭ އަމިއްލަ ބޭންކޭ ކިޔާ ރީތި ނަންނަން ދިން ނަމަވެސް ކުރާނެ ފައިދާއެއް އެބައޮތް ތޯއެވެ. ސްކޭމެކޭ ބުނެ ބަޔާނެއް ނެރުނީމަ ބޭންކުގެ ވާޖިބު އަދާ ކުރެވުނީއެވެ.
މަގުމަތީގައި ވެސް އަމާން ކަމެއް ނެތެވެ. އެމީހަކު ހިތަށް އެރި ގޮތަކަށް ދުއްވަން ވީއެވެ. ދުނިޔޭގެ ގައުމު ތަކާ އަޅާ ބަލާއިރު މާލެ އަކީ ކުޑަ ކުޑަ ސިޓީއެކެވެ. އެކަމަކު ޤަވާއިދާ ޚިލާފަށް ބާރު ސްޕީޑްގައި ދުއްވާ މީހުން ހިފެހެއްޓޭނެ ގޮތެއް ބާރެއް ފުލުހުންނަކަށް ނެތެވެ. ފުލުހުންނަށް އޮންނަ ހަމަ އެކަނި ބާރަކީ ވެހިކަލުގައި ސްޓިކަރ ޖެހުމުގެ ބާރެވެ. ޤަވާއިދާ ޚިލާފަށް ދުއްވާ މީހުންގެ ސަބަބުން މައުޞޫމު އެތައް ބައެއްގެ ފުރާނަ މިދުނިޔެއާ އަލްވަދާއު ކިޔައި ފި ތޯއެވެ. ޤާނޫނު ނަގަހައްޓާ ރައްޔިތުންނަށް ރައްކާތެރިކަން ދޭން ޙަވާލުވެފައި ތިބި މީހުންނަށް ކުރެވެނީ ކޮން ކަމެއް ތޯއެވެ. ދުއްވަންވީއެވެ. ހަމައެއް ނެތެވެ.
ދިވެހިންނަކީ އެކަކު އަނެކަކަށް އެހީތެރިވެ އޯގާތެރި ބައެކެވެ. އެހީތެރި ކަމަކަށް އެދިއްޖެ ނަމަ ހެޔޮ ހިތުން އެކަމެއް ކޮށްދިނުމަކީ ދިވެހިންގެ ޘަޤާފަތެކެވެ. ނަމަވެސް މިދިޔަ ހަފްތާ ގައި އެންމެންގެ ސަމާލު ކަމަށް އައި ކޮޓަރީގެ ބޮކި ބަދަލު ކޮށްދިނުމުގެ އެހީ ތެރިވެދިނުމަށް ގެއަށް ވަން މީހާ އޮރިޔާން ކޮށް އޭނާ ލާރި ކޮޅު ފޭރުނު މައްސަލަ އަށެވެ. އެގެއަކީ މީހުންގެ އަތުން ލާރި ފޭރުމުގެ ޕްރޮގްރާމު ހިންގާ ގެއެއްކަން ރެކޯޑު ތަކުން ދައްކައެވެ. ކިތަންމެ ވަރަކަށް ފޭރުނަސް އަދި މީހުން އެގެއަށް ވަށްދާ އޮރިޔާން ކުރިޔަސް ފުލުހުންނަށް ކުރެވޭނެ ކަމެއް ނެތެވެ. އެކަން ކުރި ބަޔަކު ބަންދު ކުރާނެ އެވެ. ހައްޔަރުވެސް ކުރާނެއެވެ. ދެން އިވޭނީ އަނެއްކާ ވެސް އެހެން މީހަކަށް އަނިޔާ ތަކެއް ހަމަ އެމީހުން ކޮށްގެން ހައްޔަރު ކުރާ އަޑެވެ. އެމީހުން މީހަކު މަރާލި ކަމުގެ ވާހަކަ އެވެ. މިއީ މިއަދު މިޤައުމުގެ ޙާލަތެވެ. މިފަދަ އެތައް ވާހަކައެއް ލިޔެވި ދާނެއެވެ. މިނިވަން ދިވެހި ރާއްޖޭގައި މިއަދު މައުޞޫމު ރައްޔިތު މީހާ ދިރިއުޅެނީ ބިރު ވެރި ކަމާއި ނަމާން ކަމާއި އެކުއެވެ. ރައްކާތެރިކަން ދޭން ޙަވާލު ވެފައި ތިބި ފަރާތްތަކަށް ކުރެވޭ އަދި ކުރާނެ ކަމެއް ވެސް ނެތެވެ. ޤާނޫނުން ނުވަތަ އެހެން ކޮންމެވެސް ބާރަކުން ނަމަވެސް ހުރަސް އަޅައިގެން ކުށް ކުރާ މީހާ އަބަދުވެސް ހުންނަނީ މިނިވަން ވެފައެވެ. ހެދުނު ބަންދު ކުރާނެއެވެ. ދެން ހަވީރު ދޫކޮށްލާނެއެވެ. ދެއިރު ކާ ބޭހަކާ ތަފާތެއް ނެތެވެ. ހޯމް ލޭންޑް ސެކިއުރިޓީ ކޮބައިތޯ؟؟؟؟
