ބްރެޒިލްގެ އައްސޭރިފަށުގައި ފަހަކަށްއައިސް ކުރެވުނު ދިރާސާއަކުން ހައިރާންކުރުވަނިވި ހޯދުންތަކެއް ވަނީ ފެނިފައެވެ. މިގޮތުން ބްރެޒިލް ކަނޑުގެ ސަރަހައްދުން ފެނުނު މިޔަރުތަކެއް މަސްތުވާތަކެއްޗަށް ޕޮޒިޓިވް ވެފައިވެއެވެ. މިކަމުން އެ ސޫފާސޫފީގެ އުޅުމަށް އަސަރުކުރުމުގެ އިތުރުން އިންސާނުންގެ ސިއްޙަތަށް ކުރާނެ ނޭދެވޭ އަސަރުތަކާމެދު ވަނީ ކަންބޮޑުވުން އުފެދިފައެވެ.
ލެއިރިއާގެ ޕޮލިޓެކްނިކް ޔުނިވަރސިޓީގެ މެރިން އެންޑް އެންވަޔަރަންމެންޓަލް ސައިންސަސް ސެންޓަރުން ކުރި ދިރާސާއެއްގައި 13 ބްރެޒިލިއަން ޝާރޕްނޯސް މިޔަރު ވަނީ މަސްތުވާތަކެތީގެ ބާވަތެއްކަމަށްވާ ކޮކެއިން އަށް ޕޮޒިޓިވް ވެފައެވެ. މީގެ އިތުރުން، 92 އިންސައްތަ ކަނޑުމަހުގައި ކޮކެއިންގެ މެޓަބޮލައިޓެއް ކަމުގައިވާ ބެންޒޮއިލެކްގޮނައިން ހުރިކަން ވަނީ އެނގިފައެވެ.
ޑރ. އެންރިކޯ މެންޑެސް ސަގިއޯރޯ ފަދަ އެކޯޓޮކްސިކޮލޮޖިސްޓުން ބުނެފައިވާ ގޮތުގައި ކޮކެއިންގެ ސަބަބުން ކަނޑުމަހުގެ އުޅުމަށް އަސަރުކުރުމަކީ އެކަށީގެންވާ ކަމެކެވެ. ސަބަބަކީ މީގެން ސިކުނޑިއަށް ކުރާ އަސަރެވެ. މިކަމުގެ ސަބަބުން ކަނޑުގެ ވެށީގައި އެ ސޫފާސޫފީގެ ދައުރަށް ބަދަލު އައުމުގެ އިތުރުން، އެ މަސް ކާ މީހުންގެ ސިއްޙަތަށްވެސް ނުރައްކާތަކެއް ކުރިމަތިވެދާނެއެވެ.
ކަނޑުގެ މާޙައުލުގައި ކޮކެއިން ފެނުމަކީ ހަމައެކަނި ބްރެޒިލަށް ޚާއްޞަ ކަމެއް ނޫނެވެ. މިފަދަ ހާދިސާތައް ދުނިޔޭގެ އެހެން ސަރަޙައްދުތަކުންވެސް ވަނީ ފެނިފައެވެ. މިކަން ގުޅިފައިވަނީ އިންސާނުންގެ ނަޖިހާއި ޤާނޫނާ ޚިލާފަށް މަސްތުވާތަކެތި އުފައްދާ ތަންތަނުން އުކާލާ ކުނިއެވެ.
